Psalms 116

A tutana nina di tar valaun ia kan ra minat i pite pa ra Luluai

1Iau mari ra Luluai, tago i tar torom
Ta ra nilaigu ma ta kaugu lavur nilul.
2Ina lotu pirana ta ra lavur bung ina laun tana,
Tago i tar lingan upi iau.
3A umana vivi na minat dia ga vake iau,
Ma ra ngala na bunurut kai ra ruarua na tulungen i ga tup iau;
A purpuruan ma ra nginarao dir ga tadav iau.
4Io, iau ga kakail tadav ra iang i ra Luluai dari:
Luluai, iau lul u, una valaun iau.
5Ra Luluai a tena varmari ma ra tena takodo;
Maia, kada God a tena varmari tuna.
6Ra Luluai i vaale bat diat dia tuptup;
Iau ga bilua ma i tar valaun iau.
7A tulungeagu, una balamat mulai;
Tago ra Luluai i mari maravut u.

8Tago u tar, valaun ra tulungeagu kan ra minat;
A matagu pa na lulur,
Ma ra kakigu pa na tutukai.
9Ina vanavana ta ra luaina mata i ra Luluai,
Ta ra gunan kai ra umana launa.
10Iau ga nurnur ba iau ga tata dari:
I tup iau tuna;
11Ta kaugu nginarao iau ga biti dari:
A tarai par a umana tena vavaongo diat.

12Ina tul tar ra ava tai ra Luluai
Ure kana lavur bo na vartabar piragu?
13Ina tak pa ka ra momamomo na valavalaun,
Ma ina lotu tadav ra iang i ra Luluai.
14A magit par ba iau ga vavalima tar ia tai ra Luluai, ina tul tar ia
Ta ra luaina mata i kana tarai par.
15Ba ra umana tena lotu kai ra Luluai dia mat,
I ngala ra nuknukina tana.
16Luluai, a dovotina iau kaum tultul;
Iau kaum tultul, natu i kaum tultul a vavina;
U tar pala kapi kaugu lavur vivi.
17Ina tul tar ra tinabar na pite varpa tam,
Ma ina lotu tadav ra iang i ra Luluai.
18Ina pait ot pa kaugu lavur vavalima pire ra Luluai,
Maia, ta ra luaina mata i kana tarai par,
Ta ra bala na gunan ta ra kuba i ra Luluai,
Livuan tam Ierusalem.,
Avat a pite pa ra Luluai.
19